पट्टागढ
पट्टागढ वा पट्टाकिला (मराठी भासय् पट्टागड) महाराष्ट्र, भारतया छगु क्वाः खः। थुकियात विश्रामगढ ( मराठी: विश्रामगड) नं धाइ। थ्व भारतया महाराष्ट्रय् नासिक व अहमदनगरया दथुइ लाःगु छगू क्वाः ख। भारतीय शासक शिवाजी प्रथम छक्वः अन वनाः विश्राम याःगुलिं थुकियात विश्रामगढ धाःगु ख। पट्टा किल्लाया बासिन्दातेत पत्तेकर, अर्थात "किल्ला पट्टाया बासिन्दा" धकाः म्हसीकिगु या। पट्टा किल्ला समुद्र सतहं करिब १,३९२ मिटर (४,५६७ फिट) च्वय् ला।
थ्व किल्ला बहमानी सल्तनतय् लानाच्वन। सन् १४९०इ बहामनी साम्राज्य विभाजित जुइवं थ्व किल्ला अहमदनगरया निजामं कब्जा यात। सन् १६२७इ थ्व थाय् मुगलतेसं त्याकल। सन् १६७१इ मोरोपन्त पिङ्गलें थ्व किल्ला कब्जा यात तर मुगलतेसं सन् १६७२इ हाकनं थ्व किल्लायात कब्जा यात। सन् १६७५इ थ्व किल्ला मोरोपन्त पिङ्गलें हानं कब्जा यात।
पट्टागढ छगू इलय् शिवाजी महाराजया स्वराज्यया सिमाय् लाःगु खः। शिवाजी जनलपुरया युद्धं बिस्युं वना सन् १६७९या नोभेम्बरय् थ्व किल्लाय् थ्यन। मुगल सेनां वय्कःयात स्वखेरं घेरे यात। जासुस व सैनिक कमाण्डर बहिरजी नाइकया कारणं शिवाजी सुरक्षित रुपं थन थ्यंकेत ताःलात।
१६८८ जनवरी ११ खुनु थ्व किल्ला माताबर खानया नेतृत्वय् मुगल सेनां कब्जा यात। वं भागुरया गोविन्दसिंहयात किल्लाया प्रमुख नियुक्त यात। लिपा पेशवां सन् १७६१इ थ्व किल्ला कब्जा यात व सन् १८१८इ थ्व किल्ला बेलायती सेनां त्याकल।