Open main menu
चिकुलाय् बैकाल पुखु

बैकाल पुखु (रूसी: о́зеро Байка́л ओज़ेरो बयकाल, बुर्यात: Байгал нуур बयगाल नुउर, अर्थ: प्रकृति पुखु) हलिंया दकले प्राचीन व गाःवंगु पुखु ख। थ्व पुखु ३ कोटी दं निसें लगातार दयावैच्वंगु दु व थुकिया औसत गाः ७४४.४ मिटर दु। अथेजुसां क्यास्पियन सागर हलिंया दकले अप्व लः दूगु पुखु ख, थुकिलि बैकालया ल्या निगु थासय् ला। क्यास्पियनया लः खारा जु, अतः, बैकाल हलिंया दकले तःधंगु फ्रेश वाटरया पुखु नं ख। यदि च्वापुइ धी जुयाच्वंगु लः व बुंया दुने स्वथनाच्वंगु लः ल्या मखायेगु खःसा हलिंया सतहय् दूगु २०% फ्रेश वाटर थ्व हे छगु पुखुलि दु। बैकाल पुखु रूसया साइबेरिया क्षेत्रया दक्षिण भागय्, रूसया निगु राज्यत (इरकुत्स्क ओब्लास्त व बुर्यात गणतन्त्र)या सीमाय् ला।

थ्व पुखुयात युनेस्कोनं हलिंया प्राकृतिक सम्पदा धलखे ल्या खाःगु दु। थ्व पुखुया हाकः ६३६ किलोमिटर दु व थ्व पुखुलि हलिंइ दूगु त्वनेज्युगु लःया न्यागु भागय् छगु व रूसय् दूगु त्वने ज्युगु लःया ९०% भाग लः दु। थ्व पुखुलि लुइगु यक्व जीव, व यक्व वनस्पतित हलिंइ गनं मलू।[१] बैकालया दकले गाःवंगु थाय् १,६४२ मिटर (वा ५,३८७ फुट) दु व थुकिया लः हलिंया दक्वं पुखुया लखे दकले सफा नालेगु या। थ्व पुखुया अकार छगु चिब्याःगु, ताःहाकःगु न्हुगु तिमिला थें च्वं।

स्वयादिसंEdit

लिधंसाEdit