ग्रिम दाजुकिजा
ब्रदर्स् गृम् वा ग्रिम दाजुकिजा (जर्मन भासय् Die Brüder Grimm) धाःगु निम्ह जर्मन दाजुकिजा ज्याकोब ग्रिम (सन् १७८५–सन् १८६३) व विल्हेम ग्रिम (सन् १७८६-सन् १८५९)या मंका नां ख। वय्कःपिं १९गू शदीया नांजाःपिं जर्मन शिक्षाविद्, भाषाशास्त्री, तजिलजि शोधकर्ता, कोशकार व च्वमि ख। वय्कपिंसं यक्य जर्मन दन्त्यकथातेत मुंका पिथनेगु ज्या यानादील। वय्कःपिंसं मुंकादीगु नांजाःगु बाखँय् "सिन्दरेला" (Cinderella वा Aschenputtel), "ब्यांचा राजकुमार" (The Frog Prince वा Der Froschkönig), "हँय् मिसा" (The Goose-Girl वा Die Gänsemagd), "हान्सेल व ग्रेतेल" (Hansel and Gretel वा Hänsel und Gretel), "रापञ्जेल" (Rapunzel), "रुम्पेल्स्तिल्त्स्किन्" (Rumpelstiltskin वा Rumpelstilzchen), व "स्नो व्हाइत" (Snow White वा Schneewittchen) आदि ला। वय्कःपिनिगु न्हापांगु दन्त्यकथा ग्रिम्स् फेरी तेल्स् (Grimms' Fairy Tales|Children's and Household Tales वा Kinder- und Hausmärchen) सन् १८१२स पिथंगु ख।
