मध्यपश्चिमी संयुक्त राज्य अमेरिका
मध्यपश्चिमी संयुक्त राज्य अमेरिका (अंग्रेजीइ Midwestern United States) संयुक्त राज्य अमेरिकाया उत्तर-मध्य क्षेत्रया नां ख। मध्यपश्चिमय् नेब्रास्का, इन्डियाना , इलिनोइ, आयोवा , क्यान्सास, मिनेसोटा, मिसौरी , मिशिगन , नर्थ दाकोता ,ओहायो, साउथ दाकोता व विस्कन्सिन ला। ओक्लाहोमा व केन्टकीयात गबलें गबलें मध्यपश्चिमी राज्यया धलखय् तयेगु या।
मध्यपश्चिम खँग्वः १९गु शताब्दीया लिपतय् निसें सामान्य छ्येलेज्याय् दयाच्वंगु दु। थ्व थाय्या मेमेगु पुलां नां आः प्रचलनय् मदु। छुं थन्याःगु पुलां नामय् "उत्तरपश्चिम" (Northwest), "पुलां उत्तरपश्चिम" (Old Northwest), "मध्य-अमेरिका" (Mid-America) वा "द हार्टल्याण्ड" (the Heartland) ला।
भूगोल
सम्पादनमध्यपश्चिमया बँय् छुं च्वापुगुं व पर्वः त्वता आपालं थासय् ख्यः दु। थनया चकंगु ख्यःयात ग्रेत प्लेन्स (Great Plains) धाइ। अपर मिसिसिपी स्वनिगःया सुदूर उत्तरी भागयात ड्रिफ्टलेस एरिया (Driftless Area)या नामं म्हसीकिगु या। थ्व क्षेत्रय् मू कथं पश्चिमी विस्कन्सिन केन्द्रित तसकं रुक्ष पहाडया क्षेत्र ला, यद्यपि थ्व क्षेत्रय् उत्तरपूर्वी आयोवा, दक्षिणपूर्वी मिनेसोता व उत्तरपश्चिम इलिनोइया चिधंगु भाग ला। विस्कन्सिनया ओकूच पर्वतय् (Ocooch Mountains) ड्रिफ्टलेस क्षेत्रया दकलय् तजाःगु च्वका दु। नापं, ओजार्क पर्वः झ्वःया उत्तरी भाग दक्षिणी मिसौरीइ ला। प्रेरी (Prairie) घाँय्ख्यलय् मिसिसिपी खुसिया पश्चिमय् च्वंगु अधिकांश राज्यत दु। थनया पश्चिमी नर्थ दाकोटा व साउथ दाकोटाय् बट्स धाःगु चट्टानी क्षेत्र व पर्वः (थियोडोर रुजभेल्ट राष्ट्रिय निकुञ्ज व ब्यादल्यान्द्स राष्ट्रिय निकुञ्ज), व पश्चिमी क्यान्सास व नेब्रास्काय् रकी च्वापुगुं झ्वःया पूर्वी बेस दु।। मध्यपश्चिमी संयुक्त राज्य अमेरिकाया पूर्वी भाग स्वयां पश्चिमी भागय् म्हो जक वा वइ। थुकिं यानाः थी थी कथंया प्रेरी दयावइ। मध्यपश्चिमया अप्व भागयात आः "नगर क्षेत्र" वा "बुंज्या क्षेत्र"य् बायातःगु दु। उत्तरी मिनेसोता, मिशिगन व विस्कन्सिन, व ओहायो खुसिया स्वनिगलया क्षेत्रय् यक्व विकास मजूनि।
शिकागो थ्व क्षेत्रया दकलय् तःधंगु नगर ख, व शिकागो धुंका दित्रोइत व इन्डियानापोलिस ख। थ्व क्षेत्रया छुं मेमेगु महत्त्वपूर्ण नगरत थ्व कथं दु: मिनियापोलिस- सेन्ट पल ,क्लिभल्यान्द, सेन्ट लुइस, क्यान्सास सिटी, मिल्वाकी, सिनसिनाटी, कोलम्बस, दि मोइन, व म्याडिसन।