सिकु क्वानशु
सिकु क्वानशु प्राचीन चीनया दकलय् तःधंगु सफू मुनाः खः। थ्व सफू चिङ राजवंशया सम्राट चियानलोङं थःगु शासनकालया ३८गु दँय् (१७७२) न्ह्यथनादिल व न्हापांगु संस्करण थःगु शासनकालया ४६गु दँय् (१७८३) पिथन, गुकिया निंतिं मुक्कं ११ दँ मालः। थ्व मुक्कं मुनाय् ३,५०३ सफू, ७९,३३७ खण्ड, व करिब ९९ कोटी ७० लखः चिनिया आखः दु। सिकु क्वानशुइ दूगु सफूत चिनिया परम्परागत प्यभलय् बायेगु पहः कथं "शास्त्रीय", "इतिहास", "दर्शन", व "मुनाः"य् बायातःगु दु। सकल भःयात हानं "कचा-पुच"लय् बायातःगु दु, गुकिलि मुक्कं ४४गु पुचः व ६६गु कचा-पुचः दु। सफूया भुसाय् थीथी पुचः बायेत थीथी रंग छ्यलातःगु दु: शास्त्रीयया निंतिं सूर्यमुखी स्वया वांगु, इतिहासया निंतिं ह्याउँगु, दर्शनया निंतिं वँचुगु व संग्रहया निंतिं खरानी रंग छ्यलातःगु दु। सिकु क्वानशुया सकल पतिइ नियमित चिनिया लिपिइ १६पु ध्वलय् व २१ चिनिया आखः दु।
सम्राट चियानलोङया शासनकालया ३७गु दँ (१७७२) निसें सम्राट चियानलोङं प्रान्तीय राज्यपाल व शिक्षा अधिकारीतय्त सफू मुंकेत बारम्बार आदेश बियादिल। वयां लिपाया दँय् सिकु क्वान्शु मुंकेत सिकु क्वानशु सफूधुकू पलिस्था याःगु खः। सिकु क्वानशु सफूधुकूया प्रमुख सम्राटया ६म्ह काय् , योङरोङ, व मेमेपिं जुयादिल। इमिगु अधीनय् मू सम्पादक जि युन, लु सिक्सिओङ, व सन शियी दु, गुम्हेस्यां वास्तवय् सिकुक्वानशुया सम्पादन यात। सम्पादक, साधारण सम्पादक, कचा सम्पादक, सामान्य धलः संयोजक, पर्यवेक्षक, मुनामि, प्रतिलिपिकार थेंज्याःगु पदय् थ्यंमथ्यं ४,००० मनूतेसं थ्व सफू दयेकेत ज्या यात। सिकु क्वानशु मुंकेगु झ्वलय् मुंकामितय्सं मुंकूगु च्वखँयात स्वंगु पुचलय् बायातःगु दु: "पिथने माःगु", "प्रतिलिपि यायेमाःगु" व "संरक्षण यायेमाःगु"। "पिथने माःगु" च्वखँतेत ध्वाया प्रसारित जुल, गथेकि वुयिङदियान दुर्लभ सफूया मुना (Wuyingdian Collection of Rare Books); "प्रतिलिपि यायेमाःगु" पुचः सिकु क्वानशुइ दुथ्याःगु दु; "संरक्षण यायेमाःगु" धइगु सिकु क्वानशु जोङमु तियाओ नांया निंतिं जक दुथ्याःगु दु व इमिगु निंतिं सार च्वयातःगु दु तर सकल च्वखँ धाःसा दुमथ्याकूगु दु। "संरक्षित धलख"य् ६,७९३ सफू व ९३,५५१ खण्ड दु। नापं, "वर्तमान राजवंशया विरोधाभास" दूगु फुक्क सफूत "प्रतिबन्धित" जुल, गुकिलिं मुक्कं करिब ३,१०० सफूत दत। तथ्यांक कथं सफू प्रतिबन्ध तयेगु झ्वलय् साहित्यिक दमनया ४० स्वयां अप्वः मुद्दा जुल।
सिकुक्वान्शुया ७गु प्रति दयेका ७गु सफूधुकू मण्डपय् स्वथनातःगु ख। न्हापांगु प्रति बेइजिङया फर्बिदन सिटी वा गुगोङ(故宫) या वेन्युआन मन्दपय् तयातःगु दु, निगूगु प्रति फेङतियन (थौंकन्हय् शेनयाङ)या निषेधित नगरया वेनसुइ मन्दपय् तयातःगु दु , स्वंगुगु प्रति बेइजिङया उपनगरय् दूगु पुलांगु समर प्यालेसया वेन्युआन मन्दपय् तयातःगु दु, व प्यंगूगु प्रति चेङदे माउन्टेन रिसोर्टया वेन्जिन मन्दपय् स्वथनातःगु दु। इमित मंका कथं "भित्री लाय्कूया प्यंगू मण्डप " (वा " उत्तरया प्यंगू मण्डप ") धकाः चिनिया भासय् म्हसीकिगु या। लिपा, जियाङसु व जेजियाङ क्षेत्र सांस्कृतिक सम्पदाया केन्द्रया रुपय् विकशित जुल व थन थीथी साहित्यिक ज्याझ्वःया विकास जुल। थ्व सफूया स्वंगु प्रति जेन्जियाङया जिनशान देगःया वेनजोङ मन्दः, याङझाउया दागुआन हलया वेनहुइ मन्दः व हानजाउया वेस्ट लेक प्यालेसया गुशान पर्वतय् च्वंगु शेङयिन देगःया वेनलान मन्दपय् तयातःगु दु। थुकियात जियाङसु व झेजियाङया स्वंगु मन्दः (वा "दक्षिणया स्वंगु मन्दः") धकाः म्हसीकिगु या। सिकुक्वानशुया प्यंगू प्रति ताइपिङ विद्रोह व बेलायती व फ्रान्सेली सेनां पुलांगु समर प्यालेस च्याकूगु इलय् क्षतिग्रस्त जूगु खः। सन् १९४९य् लाय्कू संग्रहालयय् दुगु वेन्युआङ्गे प्रतिलिपि ताइवानय् यंकूगु जुल। थ्व प्रति आः ताइपेइया राष्ट्रिय लाय्कू संग्रहालयय् दु। मेगु निगू प्रति आः लान्झाउया गान्सु प्रान्तीय पुस्तकालय व बेइजिङया चीनया राष्ट्रिय पुस्तकालयय् दु। हानजाउया जेजियाङ प्रान्तीय पुस्तकालयय् थौंकन्हय् मूल प्रतिया छगू चौथाई दु, नापं लिपाया संस्करण नं दु ।
सिकु क्वांशुयात कयाः विद्वानतय् थी थी बिचाः दु। छखे सिकु क्वानशुं आपालं सफूयात प्रतिबन्ध यात, अझ यक्व सफूया मूल पाठयात उपेक्षा याना उकिया विषयवस्तुयात नं परिमार्जन मयात, गुकियात तःधंगु विपत्ति कथं कायेगु याइ। मेखे, योंगल हलिंसफूति केन्द्रित जुया तनाच्वंगु सफूत मुंकेगु ज्यां यक्व तनाच्वंगु च्वखँत संरक्षित यात, व सिकु क्वानशुया सामान्य धलखं चिनियाँ ग्रन्थसूचीयात छगू हे थासय् हलः, गुकिया यक्व सांस्कृतिक महत्त्व दु।