सौन्दर्य दर्शन

सौन्दर्य दर्शन (वा सौन्दर्यशास्त्र) सौन्दर्यया प्रकृति व प्रकृतिनाप स्वापू दूगु दर्शनया कचा ख व व्यापक अर्थय् कलाया दर्शन ख। सौन्दर्यशास्त्रं सौन्दर्यताया दर्शनया अध्ययन जुइ। थुकथं सौन्दर्य दर्शन वा शास्त्रया ज्या "कला, संस्कृति व प्रकृतिया आलोचनात्मक चिन्तन " ख।

सौन्दर्यशास्त्रं अनुभवया थीथी स्रोत (प्राकृतिक व कृत्रिम) व मनुतेसं उगु अनुभवया स्रोतया बारेय् गथे यानाः निर्णय याइ धइगु अध्ययन जुइ। थुकी झीसं दृश्य कला स्वयेगु, संगीत न्यनेगु, चिनाखँ ब्वनेगु, प्याखंया अनुभव यायेगु, फेसन शो, संकिपा स्वयेगु, कासा स्वयेगु वा प्रकृतिया थीथी पक्षया अन्वेषण यायेगु थेंज्याःगु वस्तु वा वातावरणलिसे संलग्न जुइबलय् झीगु मनय् छु जुइ धइगु खँय् बिचाः याइ।

कला दर्शनय् विशेष कथं कलाकारतेसं गथे कलाकृतिया कल्पना, सिर्जना व प्रदर्शन याइ धैगु खँया मालेज्या जुइ। नापं मनुतेसं कलायात गथे छ्येलि, आनन्द काइ व आलोचना याइ धइगु खँ अध्ययन जुइ। सौन्दर्यशास्त्रं मनूतय्त छुं कलाकृति छाय् यःगु व मेमेगु कलाकृति छाय् मयःगु, नापं कलां झीगु भाव व झीगु विश्वासय् गुकथं लिच्वः लाकेफु धइगु खँय् नं बिचाः जुइ। सौन्दर्यशास्त्र व कला दर्शन निगुलिं कला वास्तवय् छु खः व बांलाःगु कला छु जुइ धइगु लिसः मालेगु कुतः याइ।