Template:𑐮𑑂𑐫𑐫𑐵𑐟𑑅𑐐𑐸 𑐔𑑂𑐰𑐳𑐸

𑐎𑐬𑑂𑐣𑐵𑐚𑐎

𑐎𑐬𑑂𑐣𑐵𑐚𑐎 (𑐎𑐣𑑂𑐣𑐜: ಕರ್ನಾಟಕ), 𑐰𑐵 𑐎𑐬𑑂𑐞𑐵𑐚𑐎 , 𑐡𑐎𑑂𑐲𑐶𑐞 𑐨𑐵𑐬𑐟𑐫𑐵 𑐕𑐐𑐸 𑐬𑐵𑐖𑑂𑐫 𑐏𑑋 𑐠𑑂𑐰 𑐬𑐵𑐖𑑂𑐫𑐫𑐵 𑐥𑐮𑐶𑐳𑑂𑐠𑐵 𑐣𑑀𑐨𑐾𑐩𑑂𑐧𑐬 𑑑, 𑐳𑐣𑑂 𑑑𑑙𑑕𑑖𑐏𑐸𑐣𑐸 𑐬𑐵𑐖𑑂𑐫 𑐥𑐸𑐣𑐬𑑂𑐐𑐛𑐣 𑐀𑐢𑐶𑐣𑐶𑐫𑐩𑐫𑐵 𑐀𑐢𑐷𑐣𑐫𑑂 𑐖𑐹𑐐𑐸 𑐏𑑋 𑐣𑑂𑐴𑐵𑐥𑐵 𑐠𑑂𑐰 𑐩𑐿𑐳𑐹𑐬 𑐬𑐵𑐖𑑂𑐫𑐫𑐵 𑐣𑐵𑐩𑑄 𑐣𑐵𑑄𑐖𑐵𑑋 𑐳𑐣𑑂 𑑑𑑙𑑗𑑓𑐳 𑐥𑐸𑐣𑐬𑑂𑐣𑐵𑐩𑐎𑐬𑐞 𑐫𑐵𑐣𑐵 𑐠𑐸𑐎𑐶𑐫𑐵 𑐣𑐵𑑄 𑐎𑐬𑑂𑐣𑐵𑐚𑐎 𑐖𑐸𑐰𑐣𑑋 𑐠𑐸𑐎𑐶𑐫𑐵 𑐳𑐷𑐩𑐵 𑐥𑐱𑑂𑐔𑐶𑐩𑐫𑑂 𑐀𑐬𑐧 𑐳𑐵𑐐𑐬, 𑐄𑐟𑑂𑐟𑐬 𑐥𑐱𑑂𑐔𑐶𑐩𑐫𑑂 𑐐𑑀𑐁, 𑐄𑐟𑑂𑐟𑐬𑐫𑑂 𑐩𑐴𑐵𑐬𑐵𑐲𑑂𑐚𑑂𑐬, 𑐥𑐹𑐬𑑂𑐰𑐫𑑂 𑐁𑑄𑐢𑑂𑐬 𑐥𑑂𑐬𑐡𑐾𑐱, 𑐡𑐎𑑂𑐲𑐶𑐞-𑐥𑐹𑐬𑑂𑐰 𑐫𑑂 𑐟𑐩𑐶𑐮 𑐣𑐵𑐜𑐸 𑐰 𑐡𑐎𑑂𑐲𑐶𑐞𑐫𑑂 𑐎𑐾𑐬𑐮𑐣𑐵𑐥 𑐳𑑂𑐰𑐵𑑋 𑐠𑐸𑐎𑐶𑐫𑐵 𑐎𑐸𑐮 𑐎𑑂𑐲𑐾𑐟𑑂𑐬𑐦𑐮 𑑗𑑔,𑑑𑑒𑑒 𑐰𑐬𑑂𑐐 𑐩𑐵𑐂𑐮 (𑑑,𑑙𑑑,𑑙𑑗𑑖 𑐎𑐶.𑐩𑐶.)²) 𑐡𑐸; 𑐠𑑂𑐰 𑐨𑐵𑐬𑐟𑐫𑐵 𑐎𑐸𑐮 𑐨𑑁𑐐𑑀𑐮𑐶𑐎 𑐎𑑂𑐲𑐾𑐟𑑂𑐬𑐫𑐵 𑑕.𑑘𑑓% 𑐏𑑋 𑑒𑑙 𑐖𑐶𑐮𑑂𑐮𑐵𑐣𑐵𑐥𑑄 𑐠𑑂𑐰 𑐬𑐵𑐖𑑂𑐫 𑐨𑐵𑐬𑐟𑐫𑐵 𑐔𑑂𑐫𑐵𑐐𑐸 𑐡𑐎𑐮𑐾 𑐟𑑅𑐢𑑄𑐐𑐸 𑐬𑐵𑐖𑑂𑐫 𑐏𑑋 𑐬𑐵𑐖𑑂𑐫𑐫𑐵 𑐁𑐢𑐶𑐎𑐵𑐬𑐶𑐎 𑐰 𑐡𑐎𑐮𑐾 𑐁𑐥𑐵𑐮𑑄 𑐮𑑂𑐴𑐵𑐂𑐐𑐸 𑐨𑐵𑐲𑐵 𑐎𑐣𑑂𑐣𑐜 𑐏𑑋 𑐎𑐬𑑂𑐣𑐵𑐚𑐎 𑐏𑑃𑐐𑑂𑐰𑑅𑐫𑐵 𑐄𑐡𑑂𑐐𑐩𑐫𑐵 𑐫𑐎𑑂𑐰 𑐰𑑂𑐫𑐵𑐏𑑂𑐫𑐵𑐫𑑂 𑐡𑐎𑐮𑐾 𑐳𑑂𑐰𑐷𑐎𑐺𑐟 𑐰𑑂𑐫𑐵𑐏𑑂𑐫𑐵 𑐠𑑂𑐰 𑐏 𑐎𑐶 𑐎𑐬𑑂𑐣𑐵𑐚𑐎 𑐏𑑃𑐐𑑂𑐰𑑅𑐫𑐵 𑐄𑐡𑑂𑐐𑐩 𑐎𑐣𑑂𑐣𑐜 𑐏𑑃𑐐𑑂𑐰𑑅 𑐎𑐬𑐸, 𑐀𑐬𑑂𑐠𑐵𑐟 𑐴𑐵𑐎𑐸 𑐰𑐵 𑐟𑑅𑐖𑑂𑐖𑐵𑐐𑐸 𑐰 𑐣𑐵𑐜𑐸 𑐀𑐬𑑂𑐠𑐵𑐟 𑐨𑐹𑐩𑐶 𑐰𑐵 𑐥𑑂𑐬𑐡𑐾𑐱 𑐰𑐵 𑐎𑑂𑐲𑐾𑐟𑑂𑐬𑑄 𑐰𑑅𑐐𑐸 𑐏, 𑐐𑐸𑐎𑐶𑐫𑐵 𑐳𑑄𑐫𑑀𑐖𑐣 𑐎𑐬𑐸𑐣𑐵𑐜𑐸𑐫𑐵 𑐥𑐹𑐰𑑄𑐐𑐸 𑐀𑐬𑑂𑐠 𑐴𑐵𑐎𑐸𑐐𑐸 𑐨𑐹𑐩𑐶 𑐰𑐵 𑐟𑑅𑐖𑐵𑐐𑐸 𑐠𑐵𑐫𑑂 𑐏𑑋 𑐴𑐵𑐎𑐸 𑐏𑑃𑐐𑑂𑐰𑑅 𑐠𑐣𑐫𑐵 𑐧𑐫𑐵𑐮𑐸𑐳𑐷𑐩 𑐎𑑂𑐲𑐾𑐟𑑂𑐬𑐫𑐵 𑐴𑐵𑐎𑐸𑐐𑐸 𑐔𑐵𑑄 𑐰𑑅𑐐𑐸 𑐏 𑐰 𑐟𑑅𑐖𑐵𑐐𑐸 𑐡𑐾𑐎𑑂𑐎𑐣𑐫𑐵 𑐥𑐛𑐵𑐬𑐷 𑐨𑐹𑐩𑐶𑑄 𑐰𑑅𑐐𑐸 𑐏𑑋 𑐧𑑂𑐬𑐶𑐚𑐶𑐱 𑐬𑐵𑐖𑐫𑑂 𑐠𑑂𑐰 𑐠𑐵𑐫𑑂𑐫𑐵 𑐣𑐶𑑄𑐟𑐶𑑄 𑐎𑐵𑐬𑑂𑐣𑐾𑐚𑐶𑐎 𑐏𑑃𑐐𑑂𑐰𑑅𑐫𑐵 𑐕𑑂𑐫𑐮𑐵 𑐫𑐵𑑅𑐐𑐸 𑐡𑐸, 𑐠𑑂𑐰 𑐎𑐺𑐲𑑂𑐞𑐵 𑐏𑐸𑐳𑐶𑐫𑐵 𑐡𑐎𑑂𑐲𑐶𑐞𑐥𑐵𑐏𑐾𑐫𑐵 𑐥𑑂𑐬𑐵𑐫𑐡𑑂𑐰𑐷𑐥𑐷𑐫 𑐨𑐹𑐩𑐶𑐫𑐵 𑐣𑐶𑑄𑐟𑐶𑑄 𑐥𑑂𑐬𑐫𑐸𑐎𑑂𑐟 𑐡𑐸, 𑐰 𑐩𑐹𑐮𑐟𑑅 𑐎𑐬𑑂𑐣𑐵𑐚𑐎 𑐏𑑃𑐐𑑂𑐰𑑅𑐫𑐵 𑐀𑐥𑐨𑑂𑐬𑑄𑐱 𑐏𑑋 𑐥𑑂𑐬𑐵𑐔𑐷𑐣 𑐰 𑐩𑐢𑑂𑐫𑐎𑐵𑐮𑐷𑐣 𑐂𑐟𑐶𑐴𑐵𑐳 𑐳𑑂𑐰𑐫𑐾𑐧𑐶𑐮𑐾 𑐎𑐬𑑂𑐣𑐵𑐚𑐎 𑐎𑑂𑐲𑐾𑐟𑑂𑐬 𑐫𑐎𑑂𑐰 𑐟𑑅𑐢𑑄𑐐𑐸 𑐱𑐎𑑂𑐟𑐶𑐱𑐵𑐮𑐷 𑐳𑐵𑐩𑑂𑐬𑐵𑐖𑑂𑐫𑐟𑐫𑐾𑐐𑐸 𑐎𑑂𑐲𑐾𑐟𑑂𑐬 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐠𑑂𑐰 𑐳𑐵𑐩𑑂𑐬𑐵𑐖𑑂𑐫𑐟𑐫𑐾𑐐𑐸 𑐮𑐵𑐫𑑂𑐎𑐹𑐫𑐵 𑐰𑐶𑐔𑐵𑐬𑐎, 𑐡𑐵𑐬𑑂𑐱𑐣𑐶𑐎, 𑐨𑐵𑐚 𑐰 𑐔𑐶𑐣𑐵𑐏𑑃𑐩𑐶𑐟𑐫𑐾𑐐𑐸 𑐳𑐵𑐩𑐵𑐖𑐶𑐎, 𑐳𑐵𑐴𑐶𑐟𑑂𑐫𑐶𑐎 𑐰 𑐢𑐵𑐬𑑂𑐩𑐶𑐎 𑐳𑑄𑐬𑐎𑑂𑐲𑐞𑐫𑑂 𑐠𑑁𑑄𑐫𑐵 𑐎𑐬𑑂𑐣𑐵𑐚𑐎 𑐧𑐸𑐫𑐵𑐰𑑅𑐐𑐸 𑐏𑑋 𑐨𑐵𑐬𑐟𑐷𑐫 𑐱𑐵𑐳𑑂𑐟𑑂𑐬𑐷𑐫 𑐳𑑄𑐐𑐷𑐟𑐫𑐵 𑐣𑐶𑐐𑐸 𑐴𑐾 𑐬𑐹𑐥, 𑐎𑐬𑑂𑐣𑐵𑐚𑐎 𑐳𑑄𑐐𑐷𑐟 𑐰 𑐴𑐶𑐣𑑂𑐡𑐸𑐳𑑂𑐟𑐵𑐣𑐷 𑐳𑑄𑐐𑐷𑐟𑐫𑑂 𑐠𑑂𑐰 𑐬𑐵𑐖𑑂𑐫𑐫𑐵 𑐩𑐴𑐟𑑂𑐟𑑂𑐰𑐥𑐹𑐬𑑂𑐞 𑐫𑑀𑐐𑐡𑐵𑐣 𑐡𑐸𑑋 𑐁𑐢𑐸𑐣𑐶𑐎 𑐫𑐸𑐐𑐫𑐵 𑐎𑐣𑑂𑐣𑐜 𑐔𑑂𑐰𑐩𑐶𑐟𑐫𑐾𑐳𑑄 𑐡𑐎𑐮𑐾 𑐀𑐥𑑂𑐰 𑐖𑑂𑐘𑐵𑐣𑐥𑐷𑐛 𑐳𑐩𑑂𑐩𑐵𑐣 𑐟𑑂𑐫𑐵𑑅𑐐𑐸 𑐡𑐸𑑋 𑐬𑐵𑐖𑑂𑐫𑐫𑐵 𑐬𑐵𑐖𑐢𑐵𑐣𑐷 𑐧𑑄𑐐𑐮𑐸𑐬𑐸 𑐣𑐐𑐬 𑐏; 𑐠𑑂𑐰 𑐨𑐵𑐬𑐟𑐫𑑂 𑐳𑑂𑐠𑐶𑐟 𑐟𑑅𑐔𑑂𑐰𑐐𑐸 𑐁𑐬𑑂𑐠𑐶𑐎 𑐰 𑐥𑑂𑐬𑑁𑐡𑑂𑐫𑑀𑐐𑐶𑐎 𑐏𑑂𑐫𑑅𑐫𑐵 𑐀𑐐𑑂𑐬𑐞𑐷 𑐫𑑀𑐐𑐡𑐵𑐣𑐎𑐬𑑂𑐟𑐵 𑐏𑑋

(𑐥𑐹𑐰𑑄𑐎...)