वुल्फग्याङ्ग आमाद्युस मोत्सार्त

वुल्फग्याङ्ग आमाद्युस मोत्सार्त (जर्मन आइपिए: ˈvɔlfɡaŋ amaˈdeus ˈmoːtsaʁt) न्वारनया नां योहानेस क्रिसोस्तोमस वुल्फग्याङ्गस थियोफाइलस मोत्सार्त (ज्यानुवरी २७ १७५६ – दिसेम्बर ५, सन् १७९१) छम्ह नांजाम्ह व प्रभावशाली युरोपेली शास्त्रीय संगीतज्ञ ख। वय्कलं ६०० स्वया अप्व संगीतया रचना यानादिल व वय्कःयात सिम्फोनी, कन्सर्तो, च्याम्बर संगीत, पियानो, ओपेरा व कोइर संगीतया शिखरया रुपय् नालेगु या। वय्कः सदीयौं तक्क प्रख्यात पाश्चात्य शास्त्रीय संगीतकारया रुपय् नां जा।

मोत्सार्त करिब सन् १७८०, किपामि योहान नेपोमक देल्ला क्रोसे

मोत्सार्तं थःगु बाल्यकालय् हे थःगु अद्भुत प्रतिभा साल्ज्बर्गय् क्यनादिल। मचाबिले हे किबोर्द व भायोलिन थायेसःम्ह वय्कलं न्यादँ दुबिलेहे युरोपमि राजशाहीपिनिगु थासय् बाजं थाय्गु व संगीत रचना यायेगु यानादिल। १७दँ दुबिले वय्कः साल्जबर्गया राजसभाया संगीतकार जुयादिल व लिपा अधीर जुया बांलाःगु पदवीया निंतिं चाहिलादिल। चाहिलेबिले नं वय्कलं थी-थी कथंया संगीत रचनायानादिल। सन् १७८१इ भियनाय् चाहिलादिबिले वय्कःयात वय्कःया साल्जबर्गया पदवीं पिथन। वय्कः भियनाय् हे च्वनिगु निर्णय यानादिल। भियनाय् वय्कलं यक्व नां दयेकादिल तर आर्थिक सफलता धाःसा दयेकेमफयादिल। वय्कःया भियनाकालया उत्तरार्धय् वय्कलं यक्व नांजाःगु सिम्फोनी, कन्सर्तो, ओपेरा व रेकिएमया छुं भाग (थ्व रचना वय्कः मदियादि बिलेतक नं पूमवं) रचना यानादिल। वय्कःया अल्पायुया मृत्युया बारेय् यक्व विचाः व तर्क न्ह्यथंगु दु। वय्कःया छम्ह कला व निम्ह काय् दु।

मोत्सार्तं मेमेपिं नाप अथक कथं सय्कादिल व प्रतिभा व शैलीया परिपक्वता दयेकादिल। वय्कलं हल्का व सुन्दर निसें ख्युं व भावुक शैली तक्क विकास यानादिल। वय्कःया कालान्तरय् पाश्चात्य संगीतय् प्रभाव प्रगाढ दु। बेट्होफ़नं थःगु प्रारम्भिक रचना मोत्सार्तया छत्रछाँयाय् यानादिल व जोसेफ हेय्दनं वय्कःया बारेय् च्वयादिगु दु कि "वइगु सन्ततिं थन्यागु प्रतिभा हानं १०० दँ तक्क खनिमखु" ("posterity will not see such a talent again in 100 years.")