पेशदादयान राजवंश
पेशदादयान राजवंश इरानया छगू पौराणिक राजवंश ख। थ्व राजवंशया बारेय् शाहनामेय् च्वयातःसां थ्व राजवंशया प्रामाणिक भौतिक वस्तु धाःसा मलूनि।
शाहनामेय् पेशदादयान राजवंश
सम्पादनशाहनामेया बाखँ कथं कीवमरस (केयुमर्स) दकलय् न्हापांयाम्ह मनूतेगु जुजु ख। वय्कः गुफाय् च्वंसें तिँधुँया छ्येंगुया वसः पुनाः च्वनिम्ह मनू ख। थ्व बाखँ कथं अहुरा मज़्दा(परमेश्वर)या कृपां वय्कःयाके जुजुपिंके जक्क दैगु "फर" धाःगु आलौकिक रश्मि दयाच्वन। वय्कःया काय् सियामक (Siyāmak, سیامک) सकसितं नं ययाच्वन। थ्व खँ मयःगुलिं अह्रिमन (Ahriman) धाम्ह दैत्यं थःगु सेना दयेकल। सोरुस धाम्ह द्यः नं केयुमर्सयात थ्व खँ धाःबिलय् सियामकं थःगु सेना ज्वंसें अह्रिमननाप ल्वाः वन व दानवया ल्हातं सिनावन।
केयुमर्स दच्छि तक्क बिचा हायेका च्वन व दच्छि धुंका सोरुशया अर्ती कथं अह्रिमननाप ल्वा वन। शियामकया काय् हुशंग थ्व ई तक्क ल्याम्ह जुल व कीवमर्सया सेनाया नेतृत्त्व यासें अह्रिमनया काय्यात बुकल। केयुमर्स ३०दँ तक्क राज याये धुंका थःगु गद्दि थःगु छेय् हुशंगयात त्वता मदयावन।
हुशंगं आकल-झुकलय् मि सीकल व थ्व झकायात हनेत सदेह भ्वय्या चलन न्ह्यथल। तेमोरस, जमशेद, ज़ह्हाक, कवा, फरीदूँ व वय्कःया स्वम्ह काय् सल्लम, तौर व इराजया बाखँ नं थ्व हे राजवंशया बाखँया खण्डय् दु। शाहनामेय् पेशदाद राजवंशया कालखण्डया मू पात्र कीवमरस (बादशाह) वय्कःया काय् सियामक, हुशंग (बादशाह), तेमोरस (बादशाह), जमशेद (बादशाह), अरनवाज़ (जमशेदया केहें वा म्ह्याय्), शेर नाज़ (जमशेदया केहें वा म्ह्याय्), मुर्दास (ज़ह्हाकया अबु), ज़ह्हाक (बादशाह), आबुतैन (फरीदूँया अबु), फ्रॉंक (फरीदूँया मा), जंदल (फरीदूँया नापंया मनू), कावेआएनगर (हिउपाया नायः), फरीदूँ (बादशाह), इराज (फरीदूँया काय् व बादशाह), तौर (फरीदूँया काय् तूरानया बादशाह), सल्लम (फरीदूँया काय् व शामया बादशाह), मनोचेर (बादशाह), आरिश कमा नगीर (इरानी बलामि), नोज़र (बादशाह), ज़ौ (बादशाह), गरशासप (बादशाह), साम (ज़ालया अबु खलःया मनू) आदि दु।
शाहनामे कथं थ्व राजवंशया बादशाह(जुजु)त थ्व कथं दु-
- कीवमरस वा केयुमर्स (Keyumars)
- हुशंग
- तेमोरस
- जमशेद
- ज़ह्हाक
- फरीदूँ
- इराज
- मनोचेर
- नोज़र
- ज़ौ वा जाव
- गरशासप