मार्को पोलो
मार्को पोलो (थ्यं-मथ्यं १२५४ – ८ जनवरी १३२४)) छम्ह भेनिसियन व्यापारी, अन्वेषक व च्वमि ख गुम्हेस्यां सन् १२७१ निसें १२९५ तक्क सिल्क रोडया नापं एसियाया यात्रा यात। वय्कःया यात्रा थ्यं-मथ्यं सन् १३००य् या सफू द ट्राभल्स अफ मार्को पोलोय् (वा बुक अफ द मार्भल्स अफ द वर्ल्ड व इल मिलियोन) च्वयातःगु दु। थ्व सफुतिइ तत्कालीन रहस्यमय तजिलजि व पूर्वी विश्वया आन्तरिक ज्याया वर्णन यानातःगु दु। युआन राजवंशया अधीनय् मंगोल साम्राज्य व चीनया तःधंगु आकारं व तःमि अर्थव्यवस्थां युरोपियनतेत चीन, फारस, भारत, जापान व मेमेगु एसियामि समाजया न्हापांगु व्यापक स्वरुप बिल।
| मार्को पोलो | |
|---|---|
| बूगु | 15 सेप्टेम्बर सन् 1254 Venice, Republic of Venice |
| मदूगु | 8 ज्यानुवरी 1324 (आयु 69) Venice, Republic of Venice |
| समाधि स्थल | Church of San Lorenzo 45°26′14″N 12°20′44″E / 45.4373°N 12.3455°E |
| राष्ट्रियता | Italian |
| प्रसिद्धि | The Travels of Marco Polo |
| ज्या | Merchant |
| धर्म | Catholic |
| क्वथापासा | Donata Badoer |
| मचा | Fantina, Bellela and Moretta |
| मां-अबु | Mother: Nicole Anna Defuseh Father: Niccolò Polo |
भेनिसय् जन्म जूम्ह मार्कों थः अबु व थः कका निकोलो व माफेओपाखें व्यापारिक व्यापार सयेकल। इपिं एसिया जुयाः कुबलाई खानयात नापलात। सन् १२६९स इपिं न्हापांखुसी मार्कोयात नापलायेत भेनिस लिहां वन। इपिं स्वम्हं एसियाया यात्राय् न्ह्याकल व सिल्क रोडया यक्व थासं जुसें चीन थ्यन। मार्कोया बुद्धि व विनम्रतां प्रभावित कुबलाई खानया राजदरबारं इमित स्वागत याःगु खः। मार्कोयात कुबलाईया विदेशी दूतया रुपय् ज्या यायेत नियुक्त यात, व वयात साम्राज्य व दक्षिण पूर्व एसियाय् यक्व कूटनीतिक मिसनय् छ्वल। थ्व झ्वलय् मार्कों थौंकन्हेया बर्मा, भारत, इन्डोनेसिया, श्रीलंका व भियतनामया भ्रमण यात। थ्व नियुक्तिया छगू भागया रुपय् मार्को नं चीनया दुने यक्व यात्रा यात, १७ दँ तक्क सम्राटया भूमिइ च्वंबिले मार्कों न्हापा युरोपियनतेसं मसिउगु यक्व खँ खंकल। सन् १२९१या आसपास पोलोतयेसं मार्कोयाके मंगोल राजकुमारी कोकोचिन नापं फारसय् वनेत प्रस्ताव तल; इपिं अन १२९३या आसपास थ्यन। राजकुमारीयात त्वःतेधुंका इपिं भूमिगत यात्रा यानाः कन्स्ट्यान्टिनोपल व अनं भेनिसय् वन। थथे २४ दँ लिपा मार्को छेँय् लिहां वल। थ्व ईलय् भेनिस जेनोआनाप युद्धय् लानाच्वन। मार्को भेनिसया पाखें हःताःया कुतलय् दुथ्यात अले जेनोआमितेसं वयात ज्वना यंकल। जेलय् च्वंबलय् वं थःगु समकक्षी कैदी रुस्टिचेलो दा पिसाया यात्राया थःगु जीवनया बाखं कन व रुस्टिचेलों मार्कोया बाखँ लिपिबद्ध यात। सन् १२९९य् मार्को कैदं मुक्त जुल। लिपा, वय्कः तःमिम्ह व्यापारी जुल, इहिपा यानादिल, व स्वम्ह मस्त दत। वय्कःया मृत्यु सन् १३२४य् जुल व वय्कःयात भेनिसया सान लोरेन्जो चर्चय् समाधिइ तल।
चीन थ्यंम्ह न्हापांम्ह युरोपेली मखुसां मार्को पोलों थःगु अनुभवया विस्तृत वृत्तान्त च्वया दकलय् न्हापां त्वःताः वन। वय्कःया विवरणं युरोपियनतेत पूर्वया भूगोल व जातीय तजिलजिया छगू म्हसीक बिलः। नापं वय्कःया सफूलि पोर्सिलेन ज्वलं, बारूद, भ्वंया ध्यबा, व छुं एसियाली वनस्पति व विदेशी प्राणीया न्हापांगु पश्चिमी अभिलेख दु। वय्कःया आख्यानं क्रिस्टोफर कोलम्बस व मेमेपिं यक्व यात्रीतेत प्रेरित यात। पोलोया च्वसुइ आधारित पर्याप्त साहित्य दु; वय्कलं युरोपेली कार्टोग्राफीयात नं प्रभावित यानादिल, गुकिलिं क्याटालन एटलस व फ्रा मौरो मानकिपा(Fra Mauro map) दयेकल।