लिपिशालासंदर्शनपरिवर्त

लिपिशालासंदर्शनपरिवर्त ललितबिस्तर सूत्रया झिगूगु परिवर्त ख। थ्व परिवर्तय् सिद्धार्थया आखः स्यनेगु बाखँ कनातःगु दु। सिद्धार्थ ब्वनेकुथिइ न्हापांगु न्हिइ उपस्थित जुइ, गन व अनया दकलय् वरिष्ठ गुरुयात थःगु ज्ञानं प्रभावित यानाबिज्याइ। थ्व परिवर्त थ्व कथं उल्लेखनीय ख कि थुकिलि बोधिसत्वं म्हस्यूगु लिपिया धलः बियातःगु दु। थ्व धलखं अबिलेया दक्षिण एसियामि च्वयेगु लिपि व ज्ञात लिपिया खँ कनातःगु दु। थ्व परिवर्तय् ६४ता लिपिया खँ कनातःगु दु।

लिपि

थ्व लिपिया धलखय् ब्राह्मीलिपि, खरोष्टी लिपि, पुष्करसारिंलिपि, अङ्गलिपि, वङ्गलिपि, मगधलिपि, मङ्गल्यलिपि, अङ्गुलीयलिपि, शकारिलिपि, ब्रह्मवलिलिपि, पारुष्यलिपि, द्राविडलिपि, किरातलिपि, दाक्षिण्यलिपि, उग्रलिपि, संख्यालिपि, अनुलोमलिपि, अवमूर्धलिपि, दरदलिपि, खाष्यलिपि, चीनलिपि, लूनलिपि, हूणलिपि, मध्याक्षरविस्तरलिपि, पुष्पलिपि, देवलिपि, नागलिपि, यक्षलिपि, गन्धर्वलिपि, किन्नरलिपि, महोरगलिपि, असुरलिपि, गरुडलिपि, मृगचक्रलिपि, वायसरुतलिपि, भौमदेवलिपि, अन्तरीक्षदेवलिपि, उत्तरकुरुद्वीपलिपि, अपरगोडानीलिपि, पूर्वविदेहलिपि, उत्क्षेपलिपि, निक्षेपलिपि, विक्षेपलिपि, प्रक्षेपलिपि, सागरलिपि, वज्रलिपि, लेखप्रतिलेखलिपि, अनुद्रुतलिपि, शास्त्रावर्तां लिपि, गणनावर्तलिपि, उत्क्षेपावर्तलिपि, निक्षेपावर्तलिपि, पादलिखितलिपि, द्विरुत्तरपदसंधिलिपि, यावद्दशोत्तरपदसंधिलिपि, मध्याहारिणीलिपि, सर्वरुतसंग्रहणीलिपि, विद्यानुलोमाविमिश्रितलिपि, ऋषितपस्तप्ता रोचमानां लिपि, धरणीप्रेक्षिणीलिपि, गगनप्रेक्षिणीलिपि, सर्वौषधिनिष्यन्दां लिपि, सर्वसारसंग्रहणीं लिपि, व सर्वभूतरुतग्रहणीम् लिपि ला।

थ्व धलखय् दूगु छुं लिपिया खँ थथे दु

• ब्राह्मीलिपि: दक्षिण एसियाया सिन्धु लिपि धुंका दकले पुलांगु लिपि। नेपाललिपि, देवनागरी व थीथी मेमेगु दक्षिण एसियामि लिपि थ्व हे लिपिं बुयावःगु ख।
• खरोष्टी लिपि: ब्राह्मीलिपिया समकक्षी लिपि। थ्व लिपि धाःसा जवं देपाखे च्वइ। थ्व लिपि गान्धार लिपिनाप स्वापू दूगु लिपि ख व दक्षिण एसियाया पश्चिमी भाग (वर्तमान अफगानिस्तान, पाकिस्तान) व मध्य एसियाय् थ्व लिपिया च्वखँ लूगु दु।
• किरातलिपि: किराततेगु लिपि। नेपाःया किरात लिपि नाप स्वापू दूगु लिपि जुइफु।
• द्राविडलिपि: तमिल, तेलुगु, मलयालम, कन्नड लिपिया मालिपि जुइफु।

नापं, थ्व लिपि धलखय् इतिहासया थीथी जाति वा थाय्या नां नाप स्वापू दूगु लिपितेगु नं नां बियातःगु दु। दसुया निंतिं हूणलिपि (मध्य एसियानिसें युरोपया हंगेरी वा हुण जातितेगु देय् )तक थ्यंगु जाति, चीनलिपि (चीनया लिपि ?), वङ्गलिपि (बंगालया लिपि?), अङ्गलिपि (अङ्गिका देय्या लिपि ?) आदि थीथी लिपिया नां कनातःगु दु। थथे कनातःगु थीथी लिपिया वर्णन धाःसा थ्व ग्रन्थय् बियातःगु मदु।

स्वयादिसँ

• ललितबिस्तर सूत्र
• लिपि